Risastór frístundabyggð gæti risið kringum Eiðavatn
Landeigendur að Eiðum hafa sótt um leyfi til að afmarka 160 lóðir i landi sínu undir frístundahús fyrir ferðafólk. Sveitarstjórn Múlaþings tekur vel í hugmyndina.
Eitt og hálft ár er nú síðan Eiðar fengu loks nýja eigendur þegar þeir Kristmann Pálmason og Einar Ben Þorsteinsson festu kaup á eignum gamla skólans og stórri landspildu þar í kring. Mörg ár þar á undan hafði þessi merki staður verið í niðurníðslu en þeir félagar vildu hefja hann aftur til virðingar. Töluvert starf hefur verið unnið síðan og þar ekki síst í endurbótum á húsnæðinu sem þar er til staðar.
Nú þegar útlit er fyrir að lögð verði hitaveita til Eiða innan ekki langs tíma hafa eigendurnir séð tækifæri í að afmarka um 160 lóðir undir frístundabyggð og þær lóðir margar á fallegum stöðum kringum Eiðavatnið og alveg niður að Lagarfljóti eins og sést á meðfylgjandi mynd (gullitaða svæðið). Alls er svæðið 204 hektarar og hver lóð því um hálfur hektari að stærð eða svo. Á svæðinu hefur lengi verið 17 húsa frístundabyggð á vegum BSRB og skammt frá stendur líka Kirkjumiðstöðin rétt fyrir ofan vatnið.
Aðspurður segir Einar Ben Þorsteinsson að um langtímaverkefni sé að ræða:
„Það er óvíst hvort þetta verður allt að veruleika og þarna rísa hús á öllum lóðum. En það má hugsa þetta sem svo að ef það seljast nokkrar lóðir árlega þá gæti þarna verið risin góð byggð á næstu áratugum. Þarna horfum við á nútímalega frístundabyggð með öllum þægindum annars vegar og svo hugsanlega hins vegar selja lóðir einar og sér. Öllu skiptir að gera þetta í samræmi við skipulag á svæðinu og byggð fari vel í umhverfinu.“
Sveitarstjórn Múlaþings hefur tekið vel í áform eigendanna og til stendur að leggja fram tillögu um breytingu á aðalskipulagi auk þess að gera nýtt deiliskipulag til að gefa hugmyndinni brautargengi. Í dag er þetta svæði formlega skilgreint til útiveru og náttúruskoðunar.
