Þrír í haldi vegna smyglmáls á Seyðisfirði
Þrír hollenskir karlmenn eru í haldi lögreglu vegna rannsóknar á hollensku fíkniefnamáli. Þeir voru yfirheyrðir í kvöld.
Mennirnir eru í áhöfn skips sem kom til Seyðisfjarðar á laugardag og sögðust á leið til Grænlands. Ekki er vitað hvaðan þeir komu en skipið er skráð á Saint Vincent í Karíbahafinu. Það lítur illa út, aftara mastrið er bogið og skipshliðin rispuð og beygluð. Það var ástandsskoðað til að skera úr um hvort það væri haffært.Hundar leituðu í skipinu í dag og kafarar í höfninni, að því er RÚV greindi frá í kvöld. Málningarsýni voru tekin af skipshliðinni til að kanna hvort skipið hefði lagst að öðrum skipum til að afhenda eða taka á móti smyglvarningi. Mennirnir eru í haldi á Egilsstöðum þar sem þeir voru yfirheyrðir fram eftir kvöldi.
Málið er rannsakað í samvinnu við hollensk lögregluyfirvöld sem haldlögðu nýlega þrjú tonn af marijúana. Lögreglan á höfuðborgarsvæðinu hefur, að beiðni sýslumannsins á Seyðisfirði, tekið við rannsókn málsins. Embætti ríkislögreglustjóra og tollverðir frá Tollstjóranum í Reykjavík vinna einnig að málinu. Í tilkynningu lögreglunnar segir að ekki verði frekar upplýsingar veittar um málið að svo stöddu.
