Sækja kolmunna meðan engin loðna finnst
Öll skip Eskju eru tilbúin til kolmunnaveiða og tvö þegar farin á miðin á hinu alþjóðlega Rockall svæði. Reynt er að nýta tímann til að veiða kolmunna á meðan engin loðna finnst.Jón Kjartansson kom á miðin í morgun eftir þriggja sólarhringa siglingu og hefur í dag verið að leita undan suðvesturströnd Írlands við landhelgislínuna. Að sögn Baldurs Marteins Einarssonar, útgerðarstjóra Eskju, hefur enn verið lítið að hafa.
Aðalsteinn Jónsson er á leið á miðin og Jón Kjartansson eldri og Guðrún Þorkelsdóttir eru tilbúin að fara á miðin ef veiðist. „Ef fiskurinn gefur sig þá er yfirleitt mokveiði á þessu svæði,“ segir Baldur.
Skipin freista þess að veiða sem mest af kolmunnakvóta Eskju á meðan beðið er eftir að loðna finnist innan íslensku lögsögunnar. Þá eru heldur ekki komnir á samningar um veiðar á kolmunna innan færeysku lögsögunnar, sem austfirsku skipin hafa sótt í síðustu ár enda styttra að fara.
Kolmunnaveiðar eru yfirleitt stundaðar á Rockall svæðinu í febrúar og fram í miðjan mars. Skip Eskju hafa sótt þangað síðustu ár, Jón Kjartansson eldri og Guðrún voru þar við veiðar í fyrra en hin skipin tvö fóru að loknum loðnuveiðum. Kolmunnaveiðin þá var nánast búin.
Nú er þess freistað að veiða kolmunnann á meðan enn er leitað að loðnu í íslensku lögsögunni. Loðnuleit hefur staðið yfir nánast frá áramótum og tók Aðalsteinn Jónsson þátt í henni í byrjun í tólf daga.
Í fyrra hófst loðnuveiði Eskju um miðjan janúar en aðalvertíðin er yfirleitt í febrúar og fram í miðjan mars. „Það er ekki bjartsýni á að það verði mikið af loðnu en vonast eftir einhverju,“ svarar Baldur, aðspurður um stöðuna.
