Seinheppin sveit að sunnan
Það gekk ekki þrautalaust fyrir um 50 björgunarsveitarmenn úr Reykjavík að komast austur á Hérað til aðstoðar við leit að týndri rjúpnaskyttu.
Í fyrsta lagi fór flugvélin sem fara átti með hópinn austur klukkutíma síðar í loftið en áætlað var. Afísingarbúnaður virkaði ekki sem skyldi og skipta þurfti um vél. Hún lenti á Egilsstöðum um klukkan eitt.
Hópurinn var síðan ferjaður í tveimur rútum frá flugvellinum upp stjórnstöðina í björgunarsveitahúsinu. Ekki vildi betur til en að eldur kom upp í sjónvarpinu í aftari rútunni. Björgunarsveitarfólkið hafði snör handtök, reif sjónvarpið úr sambandi og kæfði eldinn í fæðingu.
Töfin varð því lítil sem engin. Gengið er nú komið af stað til leitar.
