Seyðisfjörður: Starfslok bæjarstjóra kosta 4,6 milljónir króna
Heildargreiðslur vegna starfsloka Ólafs Hr. Sigurðssonar sem bæjarstjóra
Seyðisfjarðarkaupstaðar í vor nema 4,6 milljónum króna. Bæjarfulltrúi
segir að gengið hafi verið frá samningum án samþykkis bæjarráðs eða
bæjarstjórnar.
Ólafur sagði af sér sem bæjarstjóri í vor eftir að í ljós kom að rekstur sveitarfélagsins var langt frá áætlunum. Í kjölfarið samþykkti bæjarstjórn að forseti og varaforseti bæjarstjórnar gengju frá samkomulagi við hann sem samþykkt yrði í bæjarráði.
Guðrún Katrín Árnadóttir, fulltrúi Samfylkingarinnar í minnihluta bæjarstjórnar, segir að nú hafi verið gengið frá samningnum og honum framfylgt, án samþykkis bæjarráðs eða bæjarstjórnar. Við endurskoðun fjárhagsáætlunar 2011 kemur fram að starfslokin hafi alls kostað 4,6 milljónir króna.
Á seinasta bæjarstjórnarfundi fór Guðrún fram á að starfslokasamningurinn yrði lagður fram skriflega og sundurliðaður á næsta bæjarráðsfundi.
