Skipa starfshóp um sýnatöku úr ferðamönnum
Skipaður hefur verið stýrihópur til að gera tillögu um verklag við sýnatöku úr ferðamönnum sem koma erlendis frá til Austurlands eftir 15. júní.Í hópnum eru fulltrúar frá Heilbrigðisstofnun Austurlands, Smyril-Line, Isavia og lögreglunni. Stefnt er að því að tillögur hópsins liggi fyrir á miðvikudag. Þær verða þá sendar nýrri verkefnastjórn stjórnvalda til kynningar.
Í byrjun vikunnar skilaði verkefnastjórn um sýnatöku erlendra ferðamanna af sér tillögum sínum. Í þeim er meðal annars horft til komu Norrænu til Seyðisfjarðar og flugvéla í Egilsstaði.
Í tilkynningu dagsins frá aðgerðastjórn almannavarnanefndar Austurlands kemur fram að engin ný smit hafi greinst á Austurlandi og enginn sé í einangrun vegna Covid-19. Samkvæmt tölum af Covid.is er nú 41 í sóttkví á Austurlandi sem er umtalsverð fjölgun.
