Skriður og krapaflóð í leysingum um helgina
Talsvert var um litlar skriður og krapaflóð í hlýindum og leysingum um helgina. Spáð er roki og jafnvel ofsaveðri í nótt.Mikil leysing var í hlýindum og rigningu á Austfjörðum um helgina. Í yfirliti frá Veðurstofu Íslands segir að krapaflóð hafi fallið víða, í Fljótsdal, Fáskrúðsfirði, Eskifirði og Reyðarfirði.
Segja má að á Fagradal og í Reyðarfirði séu ummerki um að spýjur hafi komið niður flesta lækjarfarvegi.
Þá féll stórt krapaflóð niður í þorpið í Mjóafirði seinni partinn á laugardag.
Veðurstofan hefur sent frá sér viðvörun fyrir kvöldið. Spáð er suðvestanroki, jafnvel ofsaveðri seint í nótt og frameftir morgni. Ekkert ferðaveður verður á svæðinu og er íbúum ráðlagt að tryggja lausamuni utandyra til að forðast foktjón.
Hjá ofanflóðadeild fengust þær upplýsingar að enn væri talin hætta á skriðuföllum. Nálgast má nýjar upplýsingar frá deildinni að loknum stöðufundi sem hefst klukkan tvö.
Flóð hefur farið niður úr Áreyjatindi ofan í Fagradalsá á laugardag.
