Slasaðist alvarlega á vélsleða
Karlmaður á fimmtugsaldri liggur á gjörgæsludeild Landspítalans í Reykjavík eftir að hafa slasast alvarlega á vélsleða á Tröllafjalli í Áreyjardal inn af Reyðarfirði um hádegisbilið í gær. Hann er ekki talinn í lífshættu.
Maðurinn ók sleðanum yfir grjóturð með þeim afleiðingum að hann féll af sleðanum. Björgunarsveitir frá Reyðarfirði, Fáskrúðsfirði, Eskifirði, Héraði og Breiðdalsvík voru kallaðar út. Á þriðja tug björgunarsveitarmanna tóku þátt í að ná í manninn en félagar hans hlúðu að honum á meðan.
Fyrst var farið með manninn á Heilsugæsluna á Egilsstöðum en honum var síðar flogið til Reykjavíkur.
