Síldarvinnslan hlaut forvarnarverðlaun Tryggingamiðstöðvarinnar
Síldarvinnslan hf. hlaut í ár Varðbergið, forvarnaverðlaun
Tryggingamiðstöðvarinnar (TM). Verðlaunin, sem veitt hafa verið frá
árinu 1999, eru veitt þeim viðskiptavini TM sem þykir skara fram úr á
sviði forvarna gegn óhöppum os slysum.
Um Síldarvinnsluna segja sérfræðingar TM í forvörnum að félagið sé leiðandi í öryggis og forvarnarmálum. Fyrirtækið býr að öflugri liðsheild starfsmanna sem leggja grunninn að því að öllum framleiðslu, gæða- og öryggisstuðlum sé fullnægt. Tekið er skipulega á móti nýju starfsfólki með góðri fræðslu þannig að starfsmenn nái sem fyrst tökum á verkefnum sínum, fái jákvæða mynd af fyrirtækinu, kynnist helstu samstarfsmönnum sínum og þekki rétt sinn og skyldur.
Undanfarin ár hefur Síldarvinnslan hf. verið með skýra sýn á öryggis- og forvarnamál sem er nauðsynlegt fyrir rekstur sem felur í sér áhættusama þætti. Unnið er markvisst forvarnarstarf sem hefur falið í sér bætta öryggishegðun og heilsuvernd starfsmanna. Forvarnarstarfið hefur skilað þeim árangri að slysum og veikindum hefur fækkað umtalsvert. Síldarvinnslan á því mikið hrós skilið fyrir forvarnarstarfið því unnið er markvisst, jákvætt og af mikilli festu að þessum málaflokki.
Frá afhendingu Varðbergsins, forvarnarverðlauna TM á árshátíð Síldarvinnslunnar þann 3. júní. Frá vinstri; Gunnþór B. Ingvason (Framkvæmdastjóri Síldarvinnslunnar), Sonja Sif Jóhannsdóttir (forvarnarfulltrúi TM), Jón Hlífar Aðalsteinsson (Skipstjóri á Bjarti NK), Freysteinn Bjarnason (umboðsmaður TM á Neskaupstað) og Hjálmar Sigurþórsson (framkvæmdastjóri fyrirtækjaþjónustu TM). Mynd: TM
