Sorp urðað á ný í landi Tjarnarlands
Urðun á almennu sorpi frá íbúum og fyrirtækjum á Fljótsdalshéraði, Seyðisfirði og í Fljótsdalshreppi hófst að nýju á Tjarnarlandi í Hjaltastaðaþinghá í vikunni.
Urðað var á Tjarnarlandi fram í júlí 2009. Þá slitnaði upp úr samstarfinu og var sorpið fyrst urðað á Þernunesi í Reyðarfirð og síðar á Heydalamelum í Breiðdal. Bæði svæðin komu til greina þegar leitað var að nýju svæði í sumar. Bæjaryfirvöld á báðum stöðum tóku jákvætt í erindi Fljótsdalshéraðs en umhverfisráðuneytið hafnaði frekari urðun í Breiðdal.
Í frétt á vef Fljótsdalshéraðs segir að gangi allar áætlanir eftir verði sorp Héraðsbúa, Seyðfirðinga og „og jafnvel íbúa nágrannasveitarfélaga“ urðað á Tjarnarlandi í framtíðinni. Talið er að þar sé nægt land til að urða allt almennt sorp á svæðinu næstu áratugina.