Starfsmannaþorpið fær að standa fram á vor
Vinnubúðir Alcoa Fjarðaáls, sem standa að Hrauni í Reyðarfirði, verða
þar áfram fram á vor. Sveitarfélagið Fjarðabyggð vill að þær verði
horfnar fyrir lok næsta árs.
Eigna-, skipulags- og umhverfisnefnd Fjarðabyggðar hefur samþykkt óskir Aloca um að framlengja stöðuleyfi búðarinnar. Það hefur verið veitt til 1. maí 2012. Fyrir þann tíma á að liggja fyrir tímaáætlun um hvernig þorpið verður fjarlægt fyrir árslok 2012.
Búðirnar voru reistar á sínum tíma til að hýsa þá starfsmenn sem unnu að byggingu álversins. Síðan hafa þær staðið yfirgefnar og lítið gengið að selja þær eða finna þeim nýtt hlutverk. Meðan mest var dvöldust um 1.600 manns í búðunum sem reistar voru árið 2004.
Hugmyndir sem fram komu fyrr á þessu ári um að breyta búðunum í fangelsi virðast nú með öllu hafa verið slegnar af.
