Steingrímur J.: Slagurinn stendur um hversu framarlega í röðinni Norðfjarðargöng verða
Steingrímur J. Sigfússon, fjármálaráðherra og fyrsti þingmaður
Norðausturkjördæmis, segir slaginn um framtíð Norðfjarðarganga standa um
hversu framarlega þau verði í nýrri samgönguáætlun sem tekin verði
fyrir á þingi í haust. Þingmenn kjördæmisins séu sammála um að þau eigi
að ganga fyrir öðrum framkvæmdum í kjördæminu.
„Allt sem kemur til greina er þess virði að skoða það en aðalvandi okkar er sá að tryggja nægjanlegt fjármagn í samgönguáætlun til þess að verkið geti ekki eingöngu farið af stað heldur einnig til þess að fylgja framkvæmdunum eftir á næstu árum. Þetta er stór og dýr framkvæmd sem krefst 2.8 milljarða á ári eftir að framkvæmdir eru hafnar. Slagurinn stendur um það hversu framarlega í samgönguáætlun Norðfjarðargöng geti orðið,“ segir Steingrímur í samtali við héraðsfréttablaðið Austurgluggann.
Þar lýsir hann því að „mikil samstaða“ sé meðal þingmanna Norðausturkjördæmis um göngin eigi að njóta „mikils forgangs.“
„Við erum tilbúin til þess að færa fórnir til þess að Norðfjarðargöng fái stóran hluta þess fjármagns sem við höfum úr að spila hér á svæðinu á þeim árum sem framkvæmdir standa yfir. Það er ekki gleðiefni fyrir marga aðra sem bíða eftir vegastubbum hér í kjördæminu en við höfum sammælst um þetta en við erum bara þingmenn eins kjördæmis og við þurfum að ná heildarsamstöðu, bæði fyrir fjárhagsramma fyrir samgöngumál og síðan skiptingu þess.“
