![](/images/stodvarfjordur_droni_sept21_0003_web.jpg)
Stöðvarfjörður fær heimsendingarþjónustu
Íbúar á Stöðvarfirði eiga eftirleiðis hægara um vik að nálgast nauðsynjavörur úr næstu verslun því Krónan á Reyðarfirði hefur bætt þorpinu við þá staði þar sem heimsending er í boði.
Krónan hefur frá því í vor boðið upp á að heimsenda vörur til fólks í Neskaupstað og á Eskifirði og Fáskrúðsfirði gegn vægu sendingargjaldi og árangurinn verið framar vonum eins og fram kom í viðtali Austurfréttar við verslunarstjórann fyrir skömmu. Til stóð að víkka hringinn frekar síðar í sumar og það nú orðið raunin á Stöðvarfirði.
Þetta skiptir heimafólk líkast til enn meira máli en íbúa annarra byggðakjarna í Fjarðabyggð sökum þess að þar hefur ekki verið nein matvöruverslun í eitt og hálft ár síðan verslunin Brekkan var seld en kaupendurnir breyttu húsnæðinu í íbúðir. Upphaflega var þó gert ráð fyrir áframhaldandi verslun í húsnæðinu og nýir eigendur fengu meira að segja sérstakan styrk til þess verkefnis.