Stúdent frá ME fær styrk úr Afreks- og hvatningarsjóði
Glúmur Björnsson, nemandi frá Menntaskólanum á Egilsstöðum tók í sumar við styrk úr Afreks- og hvatningarsjóði stúdenta Háskóla Íslands.Glúmur var í hópi 28 nemenda sem fengu styrki að þessu sinni en styrkþegarnir eiga það sameiginlegt að hafa náð framúrskarandi árangri á stúdentsprófi og innritað sig til náms við Háskólann í haust. Hver styrkur nemur 375 þúsund krónum.
Glúmur lauk námi af náttúrufræðibraut Menntaskólans á Egilsstöðum með ágætiseinkunn. Hann hefur stundað margvíslegar íþróttir, tekið þátt í skátastarfi og þjálfað fimleikafólk. Glúmur stefnir á nám í jarðfræði og hefur sérstakan áhuga á veðri og loftslags- og umhverfismálum.
Við mat á styrkþegum er horft til árangurs þeirra á stúdentsprófi, auk annarra þátta eins og virkni í félagsstörfum í framhaldsskóla og árangurs á öðrum sviðum, til dæmis í listum eða íþróttum. Þá er stjórn sjóðsins heimilt að styrkja nýnema sem sýnt hafa fram á sérstakar framfarir í námi eða góðan námsárangur þrátt fyrir erfiðar aðstæður.