Sveitarfélagið fellst ekki á að borga skaðabætur fyrir skemmdir á lóð
Sveitarfélagið Fljótsdalshérað hefur hafnað kröfu lóðareiganda í Fellabæ um skaðabætur fyrir skemmdir á lóðum hans við framkvæmdir. Það mun þó láta laga þær skemmdir sem sannarlega urðu vegna gatnaframkvæmda.
Eigandi tveggja lóða við Lagarbraut í Fellabæ sendi sveitarfélaginu nýverið bréf þar sem hann krafðist skaðabóta vegna skemmda á lóðunum við gatnaframkvæmdir.
Á annarri lóðinni hafi verið rifin niður bæði girðing og skjólveggir, á hinni lóðinni trjáplöntur og runnar rifnar upp með stórvirkum vinnutækjum. Að auki hafi verið lagður vegstúfur á þeirri lóð án vitneskju eigandans.
Lóðareigandinn krefur sveitarfélagið um reist verði girðing í stað þeirrar sem tekin var niður, að vegbúturinn verði fjarlægður og aðrar skemmdir á lóðinni lagfærðar..
Þá krefur hann sveitarfélagið um 800 þúsund krónur í skaðabætur vegna skemmda á lóðunum og subbulegs viðskilnaðar verktaka.
Umhverfis- og framkvæmdanefnd sveitarfélagsins hefur hafnað skaðabótakröfunni en falið starfsmönnum þjónustumiðstöðvar að lagfæra þær skemmdir á lóðunum sem sannarlega urðu vegna framkvæmda við götuna.
Þær upplýsingar fengust hjá Fljótsdalshéraði í morgun að ekki hefði enn verið farið í lagfæringarnar. Það sé þó ofarlega á verkefnalistanum og hefjist vonandi í lok sumars.