Telur svæðið eiga margvísleg spennandi tækifæri
„Ég hlakka til að takast á við starfið. Mér líður vel á Austurlandi og tel svæðið eiga margvísleg tækifæri sem spennandi verður að vinna að, segir Gunnar Gunnarsson, sem ráðinn hefur verið nýr framkvæmdarstjóri Ungmenna- og íþróttasambands Austurlands.
Gunnar kemur til starfa hjá UÍA um næstu mánaðarmót og tekur við af Ester S. Sigurðardóttur sem er nýr rekstraraðili Löngubúðar á Djúpavogi.
Gunnar fluttist austur í Egilsstaði fyrir ári og hefur að undanförnu starfað fyrir Valaskjálf. Hann hefur þó lengst af búið og starfað á Akureyri, þar sem hann var meðal annars framkvæmdastjóri knattspyrnudeildar KA í áratug, en gengdi síðar sama starfi fyrir knattspyrnudeildir FH og Fylkis.
Gunnar hefur einnig reynslu af utanumhaldi Evrópuleikja í knattspyrnu, auk þess sem hann gefur gegnt trúnaðarstörfum fyrir Knattspyrnusamband Íslands.