Þörf á tveimur stuðningsfjölskyldu fyrir hverja fjölskyldu á flótta
Deildir Rauða krossins í Fjarðabyggð undirbúa þessa dagana að taka á móti fjórum flóttamannafjölskyldum sem væntanlegar eru til sveitarfélagsins upp úr miðjun febrúar. Sjálfboðaliðar Rauða krossins hjálpa flóttamönnunum út í samfélagið.„Hlutverk okkar er að styðja við bakið á þessum fjölskyldum. Við verðum með sjálfboðaliða sem verða stuðningsfjölskyldur fyrir flóttafólkið og á næstu dögum verður ráðinn verkefnastjóri sem verður í tengslum við flóttafólkið.
Þessu fólki er ætlað að hjálpa flóttafólkinu við að finna réttu leiðirnar í samfélaginu,“ segir Björn Ármann Ólafsson, svæðisfulltrúi Rauða krossins á Austurlandi.
Von er á 19 flóttamönnum frá Írak, eða fjórum fjölskyldum, sem dvalið hafa í flóttamannabúðum í Jórdaníu.
Mestur þunginn af móttökunni er á sveitarfélaginu Fjarðabyggð sem útvegar húsnæði, en reiknað er með að fjölskyldurnar verði í Neskaupstað og á Reyðarfirði. Hlutverk Rauða krossins er einnig skilgreint í samningi við velferðarráðuneytið sem heldur utan um komu fólksins.
Björn Ármann segir að vonast sé til að verkefnastjóri verði ráðinn í næstu viku, fundað verði með félagsmálasviði Fjarðabyggðar á næstu dögum og fljótlega auglýst eftir stuðningsfjölskyldum. Áhugasamir geta haft samband við deildir Rauða krossins í sínum heimabæ eða svæðisfulltrúann. Reiknað er með að tvær fjölskyldur þurfi til stuðnings hverrar fjölskyldu á flótta.
Þá er verið að undirbúa borgarafundi um komu flóttafólksins. Tímasetning þeirra verður ákveðin í næstu viku og verða fundirnir haldnir mjög fljótlega, enda skammur tími til stefnu.