Tilraunaverkefni með aukna ábyrgð hjúkrunarfræðinga gengur vel
Tilraunaverkefni sem hrint var af stað á heilsugæslunni á Egilsstöðum eftir áramótin með aukna ábyrgð hjúkrunarfræðinga hefur gefist vel. Þeir sem hafa samband við heilsugæsluna fá fyrst svar frá hjúkrunarfræðingi sem metur hvort þörf sé á aðstoð læknis eða getur leyst málin.
„Það eru allir ánægðir. Hjúkrunarfræðingarnir fá fjölbreyttari verkefni, álagið á læknana minnkar og þeir sem hringja fá lausn sinna mála símleiðis og þurfa ekki að koma,“ sagði Guðbjörg Björnsdóttir, hjúkrunarfræðingur á fræðadegi HSA fyrir skemmstu þar sem hún kynnti verkefnið.
Svipaðar tilraunir hafa verið í gangi bæði í Garðabæ og Húsavík. Verkefninu eystra var hrundið af stað til að bregðast við læknaskorti og miklu álagi á þá sem eftir voru.
„Við ræddum um hvernig við gætum minnkað álagið á læknum og móttökuriturunum sem fengu á sig reiða skjólstæðinga sem ekki fengu tíma. Hjúkrunarfræðingar eru vel menntaðir og geta leyst úr vissum verkefnum, eins og útgáfu vottorða og fleiru.
Læknarnir á Egilsstöðum hafa lýst yfir ánægju með þetta. Undirbúningstíminn var lítill og þetta fór frekar hratt og óvænt af stað en læknarnir finna mikinn mun.“
Síðasta haust var á landsvísu tekið upp vaktnúmerið 1700. Þar svara hjúkrunarfræðingar og meta hvort kalla eigi til lækni. Guðbjörg segir þá þjónustu hafa fækkað símtölum í vaktsíma lækna um helming.
Verkefnið byggir á þeirri hugmyndafræði að heilsugæslan eigi að vera fyrsti viðkomustaður sjúklinga. Aukin aðkoma hjúkrunarfræðinga hefur meðal annars gefist vel í Finnlandi. Möguleiki er að þróa verkefnið áfram, til dæmis með svokallaðri opinni móttöku þar sem hjúkrunarfræðingur tekur sjálfur á móti skjólstæðingi í samvinnu við lækni.
„Þetta var skrýtið fyrst en við sjáum betra flæði skjólstæðinga, meiri samskipti við þá og meiri ánægju þjónustuþega.“
