Tvær vikur í undirritun samnings um Norðfjarðarflugvöll
Þessa dagana er verið að ganga frá samningum um uppbyggingu og malbikun Norðfjarðarflugvallar. Framkvæmdir ættu að geta hafist innan skamms.
Lokadrög að samningi Fjarðabyggðar við ISAVIA voru lögð fram á fundi bæjarráðs á mánudag. Þar er kveðið á um skiptingu fjármögnunar við verkið.
Á fjárlögum í ár er gert ráð fyrir 80 milljónum króna í verkið en sveitarfélagið og fyrirtæki í Fjarðabyggð leggja til 75 milljónir. Jón Björn Hákonarson, formaður bæjarráðs, sagðist í samtali við Austurfrétt í dag gera ráð fyrir að samningurinn yrði undirritaður eftir tvær vikur.
ISAVIA stendur að framkvæmdinni og er að ganga frá samningi við Héraðsverk, að undangengnu útboði, um verkið. Fljótlega ætti þá að vera hægt að byrja á efnisvinnslu en verklok eiga að vera í júlí 2017.
Mynd: Kristín Hávarðsdóttir