„Ungmenni þurfa að átta sig á að Ísland er ekki eini starfsvettvangurinn“
„Okkar hlutverk í VA er að undirbúa nemendur fyrir störf á almennum vinnumarkaði og/eða frekara nám,“ segir Lilja Guðný Jóhannesdóttir, forsvarsmaður uppbyggingar alþjóðlegs samstarfs Verkmenntaskóla Austurlands við aðra verkmenntaskóla í Evrópu.
Verkmenntaskóli Austurlands hefur að undanförnu verið að byggja upp alþjóðlegt samstarf við aðra verkmenntaskóla í Evrópu og segir Lilja Guðný mikinn áhuga innan skólans á að bæta alþjóðlega færni nemenda og starfsmanna og að öðlast sterka alþjóðlega tengingu. Hún segir upphafspunktinn hafa falist í því að senda starfsmenn á tengslaráðstefnu fyrir starfsfólk í verknámsskólum í Dublin haustið 2016.
„Í kjölfarið höfum við verið að byggja upp samstarf við skóla í Danmörku, á Spáni og Þýskalandi. Við erum komin á þann stað að við höfum skoðað aðstæður í öllum þessum skólum og vinnum markvisst að því að efla samskiptin á milli skólanna og byggja upp traust tengsl sem eru lykilatriði í þessu samstarfi. Á yfirstandandi skólaári höfum við sent kennara í „starfspeglunar-heimsóknir“ (e. job-shadow) til allra þessara samstarfsaðila og einnig höfum við sent nokkra húsasmíðanemendur til Danmerkur í skiptinámsdvöl í samstarfsskóla okkar í Viborg á Jótlandi.“
Samstarfið teygir sig um allt samfélagið
Lilja Guðný segir að forsenda fyrir erlendum samstarfsverkefnum sem þessum sé styrkjaöflun en VA sótti um og hlaut styrk til þessa verkefnis úr Erasmus+, menntaáætlun Evrópusambandsins.
„Einnig var ákveðið að horfa að hluta til út fyrir landsteinana í endurmenntun starfsmanna og fjórir kennarar í vetur hafa sótt námskeið erlendis. Við höfum einnig tekið á móti gestum í vetur, bæði kennara og nemendur. Í apríl koma til okkar sex nemendur frá Danmörku sem munu sækja nám í VA en einnig starfsnám hjá Launafli, Síldarvinnslunni og Trévangi. Skrifstofunemendur frá Þýskalandi eru svo væntanlegir í haust sem munu sækja starfsnám hjá stofnunum Fjarðabyggðar. Á þessu má því sjá að þetta samstarf teygir sig víða innan samfélagsins og þátttaka og velvilji fyrirtækja og stofnana í Fjarðabyggð er afar mikilvæg forsenda þess að hægt sé að taka þátt í þessu samstarfi.“
Framtíðin kallar á sveigjanleika og samstarfshæfni
Lilja Guðný segir verkefnið afar mikilvægt. „Vegna aukinnar alþjóðavæðingar er afar mikilvægt að nemendur séu ekki aðeins undirbúnir fyrir frekara nám og starf á Íslandi heldur einnig á alþjóðlegum markaði. Ungmenni í dag þurfa að átta sig á að Ísland er ekki eini starfsvettvangurinn sem þeim býðst, heldur er öll Evrópa undir. Framtíðin kallar á sveigjanleika og samstarfshæfni og vegna alþjóðavæðingar er góð tungumálakunnátta orðin lykilhæfni. Með þátttöku í erlendu samstarfi teljum við okkur vera að undirbúa nemendur í auknum mæli fyrir það sem fram undan er.
Markmið okkar er að alþjóðlegt samstarf verði sjálfsagður þáttur í skólastarfinu. Að nemendur okkar og starfsfólk eigi raunverulegan möguleika á því að taka þátt í erlendu samstarfi, hvort sem er með því að fara erlendis eða með því að taka á móti erlendum gestum til okkar, að þátttaka sem þessi verði hluti af skólamenningunni.“
