Varað við slitlagsblæðingum á austfirskum vegum
Vegagerðin varar vegfarendur á Austurlandi við mögulegum slitlagsblæðingum. Slitlagskögglar sem brotna af bílum geta verið varasamir.
Varað er við blæðingum á milli Egilsstaða og Norðfjarðar, einkum þó milli Eskifjarðar og Norðfjarðar. Mikilvægt er að draga úr hraða þegar bílar mætast og skoða vel dekkin áður en farið er í lengri ferðir og hreinsa þau ef vart verður við tjöru.
Eftir snjókomuna um helgina er færð tekin að spillast og víða er fljúgandi hálka í fjórðungnum. Ófært er til Mjóafjarðar og yfir Öxi og Hellisheiði.
Vegirnir heyra allir undir G-reglu í vetrarþjónustu. Þá er í mesta lagi mokað tvisvar í viku á meðan snjólétt er á tímabilinu 1. nóvember til 20. mars. Ekki er farið sérstaklega yfir færð á þeim, frekar en Breiðdalsheiði sem einnig er í flokknum, í skeytum Vegagerðarinnar.
Í hlýindaköflum við snjóléttar aðstæður kann að vera vikið frá þessum reglum en Vegagerðin metur hvort viðkomandi mokstur sé raunhæfur með tilliti til notagildis og kostnaðar.
