Vegir skemmdir eftir mikla vatnavexti
Vatn hefur víða flætt yfir vegi á Austurlandi í miklum vatnavöxtum eftir úrkomu vikunnar. Á nokkrum stöðum eru vegir í sundur.
Fljótsdælingar hafa sjaldan séð aðra eins vatnavexti á þessum árstíma og segja dalinn hreinlega á floti. Lækir komi hvítfissandi niður hlíðarnar og á nokkrum stöðum eru vegir í sundur.
Hjá Vegagerðinni fengust þær upplýsingar að flætt hefði yfir vegi víða í fjórðungnum. Í Berufirði hefði runnið yfir á þremur stöðum, við bæina Berufjörð og Melshorn og sunnan til í firðinum.
Á suðurströnd Fáskrúðfjarðar flæddi einnig yfir vegi á þremur stöðum. Varað var við ástandinu við Naustá eftir hádegið en þar hefur vatnið sjatnað. Kantar vegarins eru skemmdir.
Í Breiðdal rann yfir veginn innan við bæinn Kleif. Í Skriðdal flæddi við Skriðuvatn. Þá munu lítilsháttar skemmdir hafa orðið á Efri-Jökuldal.
Einhverjar skemmdir urðu hafa orðið en þær verða skoðaðar þegar veðrið lagast. Mesta úrkoma á landinu þennan sólarhringinn er í Neskaupstað, tæpir 130 mm.
Vegur í sundur milli Víðivalla og Hrafnkelsstaða í Fljótsdal. Mynd: Guðbjörg Pálsdóttir.