Vegurinn í botni Berufjarðar fór illa í rigningum
Nokkrar minniháttar skemmdir urðu á vegum austan lands í rigningum og leysingum um helgina. Verið er að laga þjóðveginn í botni Berufjarðar sem fór illa í vætutíðinni.Þeir bílar sem leið áttu um þjóðveg 1 í botni Berufjarðar í gær siluðust áfram þar sem í honum var fjöldi hola sem ómögulegt var að fara yfir á nokkurri ferð.
Talsverð þungaumferð hefur verið um veginn þar sem verið er að keyra efni í nýja veginn yfir fjörðinn. Þung og mikil umferð um þjóðveginn í vætutíð hefur farið illa með hann.
Hjá Vegagerðinni fengust þær upplýsingar í hádeginu að verið væri að hefla veginn en erfitt væri að halda honum við í mikilli vætutíð.
Minniháttar skemmdir urðu á nokkrum stöðum á Austfjörðum um helgina þar sem vatn rann yfir vegi í leysingum. Verið er að laga skemmdir í sunnanverðum Fáskrúðsfirði þar sem rann úr veginum á tveimur stuttum köflum.
Skemmdir urðu víðar, svo sem á leiðinni út að Helgustöðum. Þá hefur Austfrétt spurnir af grjóthruni í Vattarnesskriðum. Ekki er vetrarþjónusta á þeim vegi og því ekki búið að skoða ástandið þar.
Í Berufirði í gær.
