Vilja koma laxi framhjá Steinboganum: Hafnað á grundvelli náttúruverndarsjónarmiða
Hagsmunaaðilar við Jökulsá á Dal vilja búa til rás meðfram ánni þar sem steinbogi er í henni. Lax stoppar neðan við ána og gerir hana að síður vænlegri veiðiá. Öllum framkvæmdum á svæðinu hefur til þessa verið hafnað á grundvelli náttúruverndarsjónarmiða.
Frá þessu er greint í nýjasta tölublaði Austurgluggans. Þegar áin er vatnslítil stoppar laxinn neðan við steinbogann á leiðinni heim á æskustöðvarnar. Þetta þýðir að aðeins 30 km af um 100 í ánni eru nýtilegir til laxveiði.
Forsvarsmenn veiðifélags árinn vilja búa til rás meðfram ánni sem virki eins og laxastigi. Ekki verði farið út á svæði bogans við þessar framkvæmdir og segja þeir það aldrei hafa staðið til.
Gilið sem boginn tilheyrir er á náttúruminjaskrá. Umhverfisstofnun og Náttúruverndarsamtök Austurlands hafa lagst gegn fyrirhugaðri framkvæmd. Fyrr í sumar var henni hafnað af skipulags- og mannvirkjanefnd Fljótsdalshéraðs af náttúruverndarsjónarmiðum.
