Vopnafjörður fær hálfan milljarð fyrir hlut sinn í HB Granda
Vopnafjarðarhreppur hefur selt öll sín hlutabréf í útgerðarfyrirtækinu
HB Granda. Tæplega hálfur milljarður fæst fyrir bréfin. Fjárhagur
sveitarfélagsins styrkist verulega við söluna.
Það var verðbréfafyrirtækið Virðing sem gerði sveitarfélaginu tilboð í hlutina. Reikna má með að fyrirtækið komi fram fyrir hönd fjárfestis sem enn er óþekktur. Reiknað er með að það skýrist á næstu dögum hver það er.
Hreppurinn og félag í hans eigu seldu 2,5% af heildarhlut í HB Granda miðað við gengið 12,1 á hlut eða 478 milljónir króna. Nafnvirði bréfanna var tæpar 40 milljónir króna og hluturinn bókfærður á genginu 6 í ársreikningi sveitarfélagsins. Salan var samþykkt samhljóða á sérstökum fundi sveitarstjórnar í síðustu viku.
Í frétt á vef hreppsins segir að salan styrki fjárhag sveitarfélagsins. Skuldir þess, sem báru vexti, námu 940 milljónum króna í lok síðasta árs. Reikna má með að stór hluta söluandvirðisins verði varið til niðurgreiðslu skulda.
Áætlað útflutningsverðmæti HG Branda frá Vopnafirði er 4-5 milljarðar króna.
