Annar látinn og hinn mikið slasaður
Annar tveggja manna um borð í einkaflugvélinni sem brotlenti á Vopnafirði í dag lést í slysinu. Hinn var fluttur með sjúkraflugi til Reykjavíkur mikið slasaður. Rannsóknarnefnd flugslysa og lögregla í umdæmi sýslumannsins á Eskifirði fara með rannsókn málsins.
Flugvélin, Cessna 180 TF-GUN, sem var að koma af flugvellinum á Vopnafirði, brotlenti örskammt frá veiðihúsinu Hvammsgerði við Selá síðdegis. Rafmagnslína þar hjá er slitin, en ekki er ljóst hvort flugvélin fór utan í hana, þó það þyki líklegt. Maðurinn sem lést var um fimmtugt, en hinn um sextugt. 