Gott í gogginn: Kerfilpestó, fíflakaffi og rabarbaraís að hætti Frú Lúlú
Höfundur: Steinunn Ásmundsdóttir • Skrifað: .
Austurglugginn hefur lagt það í vana sinn að birta ómótstæðilegar mataruppskriftir fyrir helgar til að auka við innblástur austfirskra kokka. Að þessu sinni deilir Hákon Guðröðarson á Frú Lúlú í Neskaupstað með okkur brakandi ferskum sumaruppskriftum. Þar er ýmislegt nýnæmi á ferð.
,,Sumarið er svo sannarlega tíminn í mínum augum, því þá spretta upp hinar ýmsu munaðarvörur allt um kring. Ég er nefnilega mjög heillaður af því að nota það sem íslensk náttúra hefur upp á að bjóða; ferskara og ódýrara gerist það ekki og ekki veitir af á tímum sem þessum. Í bakgarðinum hér á Frú LúLú eru þrjár plöntur sem ég notfæri mér mikið í eldhúsinu. Fyrst ber að nefna rabarbarann sem ég nota mikið af í bakstur og sultu, einnig er það kerfillinn sem ég nota í salöt og pestó og svo að lokum fíflar sem ég, ótrúlegt en satt, brugga kaffi úr. Ætla ég að deila með ykkur einni uppskrift fyrir hvert af framangreindum hráefnum."
---
KerfilspestóCa 150 g kerfilblöð, skoluð / Ca 100 g rucola salat / 4-5 hvítlauksgeirarhnefafylli af ristuðum furuhnetum / Maldon salt / Extra Virgin ólífuolía af bestu sort
Ég tek fram að persónulega er ég mikill ástríðumaður í eldamennsku og notast því lítið við uppskriftir en treysti frekar á bragðlaukana og ráðlegg ég að gera það sama með þessa uppskrift.Allt hráefnið sett saman í matvinnsluvél og smakkað til. Best með nýbökuðu brauði.
---
Fíflakaffi
Hver hefði trúað því að rótin af þessu illgresi sem vex í öllum görðum væri afbragðs hráefni í kaffi? Allavega ekki mér fyrr en ég fékk það smakkað. Bragðið er einhvers staðar mitt á milli kaffis og svarts tes og er drykkurinn koffínlaus svo það hentar einkar vel á kvöldin fyrir þá sem ekki þola kaffi á þeim tíma.
Stingið upp rótina og skolið vel undir rennandi vatni með hreinum busta. Skerið í teninga og stráið í ofnskúffu. Setjið í ofn á 180°C þar til kominn er kaffibrúnn litur á teningana. Kælið og malið smátt eins og kaffi. Duftið er notað alveg eins og kaffi nema í eilítið minni skömmtum þar sem það er bragðsterkara en venjulegt kaffi. Geymist vel í loftþéttum umbúðum. Uppáhalds drykkurinn minn úr fíflarót er latté með hálfri teskeið af hunangi.
---
Rabarbaraís
500 g rabarbari, snyrtur og smátt skorinn / 200 g sykur (aukið eða minnkið eftir þroska rabarbarans) / 200 ml rjómi.
Þessi ís er líklegast sá einfaldasti sem hugsast getur þar sem í honum er einungis þrjú hráefni. Svo er hann ljómandi bragðgóður og alveg einstaklega fallegur á litinn. Setjið rabarbarann og sykurinn saman í pott, hrærið vel saman og setjið á lágan hita á hellunni. Látið malla í ca 30 mínútur og hrærið stöku sinnum til að ekki brenni við. Takið af hitanum þegar hræran er orðin mjúk og mestur vökvinn hefur gufað uppLátið kólna í ískáp. Þegar blandan hefur kólnað er hún sett í matvinnsluvél þar til hún verður mjúk sósa. Setjið í skál og hrærið saman við rjómanum. Ef þið búið svo vel að eiga ísvél er hrærunni hellt í hana og leiðbeiningum framleiðanda fylgt. Ef ekki er til ísvél á heimilinu er hræran set í frystibox og þaðan í frystinn og hrært á ca 15 mínútna fresti þar til hún nær þéttleika.
---------------------
Verði ykkur að góðu
Markmið Austurfréttar er að byggja upp vef sem tengir saman Austfirðinga, sama hvar þeir eru niðurkomnir og flytja fréttir úr þeirra samfélagi.
