„Húsfyllir“ á fyrsta konukvöldi Píluklúbbs Vopnafjarðar
Sú staðreynd að níu mánaða gamall píluklúbbur í fámennu byggðalagi státi sig nú þegar af einstaklingi sem kominn er í úrtakshóp fyrir landslið Íslands í greininni er saga út af fyrir sig. Ekki síður merkilegt að „húsfyllir“ var á fyrsta konukvöldi klúbbsins á miðvikudaginn var.
Hér er um að ræða Píluklúbb Vopnafjarðar sem formlega var stofnaður í júlí í fyrra en sökum mikils almenns áhuga eru nú þegar uppi hugmyndir innan klúbbsins að koma á fót sérstakri mótaröð næsta vetur að sögn nýkjörins formanns Kristins Ágústssonar. Hin vítamínsprauta klúbbsins er Dilyan Kolev sem vann til verðlauna á sterku móti í Færeyjum fyrir skömmu og Austurfrétt fjallaði um hér.
Konurnar láta sitt greinilega ekki eftir liggja í íþróttinni. Um 20 þeirra mættu og kepptu sín á milli á fyrsta konukvöldi klúbbsins fyrr í vikunni en fjöldinn svo mikill að í kjölfarið fóru að heyrast raddir um að stækka þyrfti aðstöðuna fljótlega með tilliti til áhugans. Klúbbaðstaðan nú er í húsnæði gamla fiskmarkaðs staðarins.
Sjálfur segir Kristinn að fjöldinn sem stundi sportið á Vopnafirði sé töluverður enda margir sem séu með sín eigin píluspjöld heimavið fyrir utan ágætan fjölda í píluklúbbnum sjálfum. Gleðilegt sé hversu vart hafi orðið við stóraukinn áhuga enn fleiri síðustu misserin og það lofi góðu fyrir framtíðina.
Konur á öllum aldri skemmtu sér dável á konukvöldi Píluklúbbs Vopnafjarðar í vikunni. Mynd Brynjar Davíðsson
