Notið hjálma

Höfundur: Steinunn Ásmundsdóttir • Skrifað: 06. maí 2009.

Nú þegar átakið „Hjólað í vinnuna“ er hafið má sjá mikla aukningu hjólreiðarfólks á götum úti. Slysavarnafélagið Landsbjörg hvetur alla landsmenn til að nota alltaf þann sjálfsagða öryggisbúnað sem reiðhjólahjálmurinn er þegar hjólað er. Hjálmurinn ver fyrir alvarlegum höfuðáverkum í 80% til 85% tilfella en alvarlegustu slysin verða þegar hjólað er í bílaumferð.

Slysavarnafélagið Landsbjörg bendir á góða punkta í sambandi við hjólreiðahjálminn:

             Hjálmurinn á að vera CE merktur sem þýðir að hjálmurinn uppfyllir lámarkskröfur um öryggi.

             Líftími hjálma er fimm ár frá framleiðsludegi en þrjú ár frá söludegi svo farmarlega sem hjálmurinn verður ekki fyrir hnjaski, en hjálmur sem hefur orðið fyrir miklu höggi er ónýtur.

             Hjálmurinn þarf að vera af réttri stærð, merking sem sýnir stærð hans er inni í honum. Nauðsynlegt er að máta hann áður en hann er keyptur.

             Hjálmurinn á að sitja beint ofan á höfðinu, einn eða tveir fingur eiga að komast á milli höfuðbands og hökunnar.

             Hjálmur í skærum lit sést best í umferðinni.

             Fylgjast þarf reglulega með því að hjálmurinn sé rétt stilltur og mikilvægt er fara eftir leiðbeiningum.

             Ef hlífa þarf höfði við kulda er best að hafa þunna lambhúshettu, ,,buff“ eða eyrnahlífar sem eru sérstaklega hannaðar fyrir hjálma.

             Hvorki má líma merki né mála á hjálminn. Þá getur höggþol minnkað.

Um hjólreiðar:

             Farið eftir almennum umferðarreglum.

             Notið gangstéttar, göngu- og hjólreiðastíga.

             Verið með réttan útbúnað á hjólinu.

             Gangið úr skugga um að hjólið sé í lagi, sér í lagi bremsur.

Í sambandi við börn og hjólreiðar:

Börn hafa ekki fullkomið vald á grófhreyfingum. Jafnvægisskyn þeirra er ekki fullþroskað og samhæfingu vantar í hreyfingar. Þau hafa litla reynslu af umferð, takmarkaða hliðarsýn, geta ekki skynjað hraða og fjarlægð ökutækja sem nálgast og geta átt erfitt með að átta sig á því úr hvaða átt hljóð kemur. Þau geta verið upptekin við leik og gleymt sér og eru of lágvaxin til að sjá yfir bíla

             Almenna reglan ætti að vera að börn undir 12 ára aldri noti aðeins göngu- og hjólreiðastíga.

             Best er að hafa fyrsta hjólið eins einfalt og kostur er, með fótbremsu og ekki er mælt með hjálpardekkjum.

             Verum viss um að barnið hafi fullt jafnvægi og geti bremsað af öryggi áður en það fer eitt af stað.