106 íbúðir á Austurlandi seldar til Heimavalla
Íbúðalánasjóður undirritaði í gær samning við leigufélagið Heimavelli um kaup þess á 139 fasteignum af sjóðnum í einu lagi en 106 íbúðanna eru á Austurlandi. Heimavellir átti hæsta tilboðið í íbúðirnar í opnu söluferli sem hófst í desember síðastliðnum.
Í heild voru 504 fasteignir í fimmtán eignasöfnum auglýstar samtímis og gátu allir boðið í þær sem vildu. Alls bárust kauptilboð frá 43 ólíkum aðilum í eignirnar. Gengið verður frá sölu á fleiri eignum á næstu dögum. Sala íbúðanna 139 til Heimavalla mun hafa jákvæð áhrif á afkomu Íbúðalánasjóðs en söluverðmæti þeirra nemur alls um 1,8 milljörðum.
Jákvæð merki sjást á landsbyggðinni
Eignirnar sem Heimavellir hafa nú keypt af Íbúðalánasjóði eru í fjórum eignasöfnum á Austfjörðum, á Vestfjörðum og á Vesturlandi. Langflestar þeirra eru á Austfjörðum. Tilboðsgjafar í eignirnar hafa talið að jákvæð merki sem nú sjáist á landsbyggðinni, breytingar í atvinnurekstri, fjölgun ferðamanna og meira framboð afþreyingar muni styðja við þessi svæði. Innkoma traustra leigufélaga mæti mikilli eftirspurn sem verið hefur eftir leigueignum á þessum stöðum að undanförnu.
Seldi 18 íbúðir á Fáskrúðsfirði
Með sölunni til Heimavalla lækkar eignastaða Íbúðalánasjóðs á Austurlandi úr 232 eignum í 126 eignir. Þá má sömuleiðis nefna að sjóðurinn seldi nýverið 18 eignir á Fáskrúðsfirði til annars leigufélags og hefur mikil eftirspurn verið eftir leigu þeirra íbúða. Samsetning eigna í hverju safni í söluferlinu miðaðist við að hagkvæmt gæti verið að reka um þær leigufélög og eru eignir í hverju þeirra að jafnaði í sama byggðarlagi.
„Þessi samningur er afar jákvæður fyrir nokkur bæjarfélög á landsbyggðinni,“ segir Hermann Jónasson, forstjóri Íbúðalánasjóðs í tilkynningu.
„Með honum er leyst úr því óvissuástandi sem verið hefur um þessar eignir nú þegar þær komast í hendur framtíðareigenda. Ég fagna því hve mikil þátttaka var af hálfu fjárfesta og okkur virðist Íbúðalánasjóður fá gott verð með því að selja eignirnar í opnu söluferli. Þá er mikilvægt að þessi sala hefur jákvæð áhrif á afkomu sjóðsins.“
Vaxið hratt
Í frétt DV frá í nóvember segir að Heimavellir hafi á skömmum tíma orðið eitt umsvifamesta leigufélag landsins með kaupum á hundruðum íbúða á síðustu árum, mörgum af Íbúðalánasjóði. Blaðið segir Stálskip og Sjóvá stærstu hluthafana en í eigendahóppnum séu einnig þekktir fjárfestar eins og Þórður Már Jóhannesson, fyrrverandi forstjóri Straums fjárfestingarbanka, og Arnar Gunnlaugsson, fyrrverandi knattspyrnukappi.
Í stefnu Heimavalla segir að markmið þess sé að bjóða upp á „gott úrval af leiguíbúðum fyrir einstaklinga og fjölskyldur með örugga leigu til langs tíma.“ Þannig svari félagið „eftirspurn á húsnæðismarkaði eftir stöðugleika og öryggi í húsnæðismálum.“ Félagið sé byggt upp að evrópskri fyrirmynd þar sem leigufélög sem bjóði upp á „örugga langtímaleigu séu eðlilegur hluti af þroskuðum og heilbrigðum fasteignamarkaði.“
