Lagarfljótið byrjað að renna um nýjan ós – Myndir
Lagarfljótið hóf að renna um nýjan ós á Héraðssandi á þriðjudagskvöld en hann var grafinn til að beina fljótinu aftur í eldri farveg. Verkefnisstjóri hjá Landsvirkjun segir útlitið með nýja ósinn gott en treyst sé á hagstætt veður fyrstu dagana á meðan fljótið grefur sig þar út.„Þetta er eins og við vonuðumst til en við getum ekki enn fullyrt að áin velji þennan ós. Við þurfum þokkalegt veður nokkra daga í viðbót. Ef það kæmi norðaustan stórviðri þá gæti hann lokast," segir Helgi Jóhannesson, sérfræðingur á þróunarsviði Landsvirkjunar.
Ós Lagarfljóts hefur færst rúma þrjá kílómetra til norðurs á þessari öld og óttast var að héldi hann áfram þeirri för gæti jökulvatn úr honum skaðað lífríki veiðiáa í nágrenninu. Því var gripið til þess ráðs að grafa skurð og beina fljótinu aftur á þann stað þar sem það féll til sjávar seinni hluta síðustu aldar.
Byrjað var að grafa snemma í síðustu viku og á þriðjudagskvöld var farvegurinn opnaður til sjávar. „Okkur tókst það reyndar ekki í fyrstu tilraun því það var of mikið brim en við biðum í nokkra klukkutíma og gerðum aðra tilraun sem tókst þegar búið var að fjara meira út," segir Helgi.
Hugmyndin er að fljótið grafi sig síðan sjálft niður í nýja farveginn og stækki hann. Fyrstu dagarnir lofa góðu um það.
„Í gærmorgun var nýi farvegurinn nánast búinn að tvöfaldast og rennslið var orðið enn meira þegar aðstæður voru skoðaðar í morgun þannig þetta lítur vel út."
Myndir: Hjalti Stefánsson
