Gengið á undan björgunarsveitarbílum yfir Oddsskarð - Myndir
Ekki tókst að opna veginn yfir Oddsskarð í dag eins og vonir stóðu til en tekist hefur að halda Fjarðarheiði jeppafærri. Ganga varð á undan björgunarsveitarbílum sem brutust yfir skarðið með heilbrigðisstarfsmenn.Lagt var af stað frá Norðfirði á ellefta tímanum í morgun en vaktaskipti voru á Fjórðungssjúkrahúsinu og koma þurfti starfsmönnum í flug á Egilsstöðum.
Starfsfólkinu var fylgt yfir á Eskifjörð og komið þangað um klukkan eitt. Þar voru sjómenn sem biðu þess að komast um borð í Bjart. Þeim var fylgt strax yfir til baka en björgunarsveitin fór aðra ferð seinni partinn til að sækja lækna sem voru að koma í stað þeirra sem fóru um morguninn.
„Fyrri ferðin gekk hörmulega. Þótt snjóblásari væri á undan okkur mest alla leiðina var svo blindað að við þurftum að labba á undan bílunum stóran hluta leiðarinnar," segir björgunarsveitarmaðurinn Ísak Fannar Sigurðsson.
Seinni ferðin gekk betur. Vind hafði þá lægt en Ísak segir að mjög mikill snjór sé á Oddsskarði. Þá bætti ekki úr skák að bílar voru fastir á skarðinu.
„Oddsskarðið var hræðilegt og kolófært," segir Kristbjörg Þórisdóttir, sálfræðingur sem var farþegi í fyrri ferðinni.
„Það eru 1-2 metra há snjógöng alla leiðina og ég hugsa að skaflarnir nái 4-6 metrum þar sem þeir eru hæstir. Við sáum ekkert út. Það kom stanslaust snjór á rúðuna."
Mokstursmenn fóru af stað klukkan fimm í morgun en gáfust upp um hádegið við að reyna að opna. „Það gekk illa og við sáum ekki neitt. Vindhviðurnar voru 28 m/s og það skóf strax í aftur í snjógöngunum. Það hefði enginn getað nýtt sér það þótt við hefðum opnað," segir Sveinn Valtýsson hjá Vegagerðinni á Reyðarfirði.
Aðstæður á Fjarðarheiði eru um margt svipaðar, 4-6 metra djúp snjógöng á löngum köflum. Þeim vegi hefur þó tekist að halda jeppafærum í dag.
Ófært er einnig til Vopnafjarðar en mokstri var hætt á Háreksstaðaleið um hádegið. Til Borgarfjarðar eystri hefur verið fært en þæfingur yfir helgina.
Myndir 1-4 af Fjarðarheiði: Sveinn Einarsson og Björgunarsveitin Ísólfur.
Myndir 5-10 af Oddsskarði: Ísak Fannar Sigurðsson
