Icelandair skoðar millilandaflug frá Egilsstöðum
Icelandair skoðar möguleikann á að bjóða upp á millilandaflug frá Egilsstaðaflugvelli sumarið 2015. Farþegar gætu þá innritað sig í flug Flugfélags Íslands á Egilsstöðum sem flytti þá til Keflavíkur og þar gætu menn farið vandræðalítið á milli hliða. Ekkert er þó ákveðið um verkefnið.Samkvæmt heimildum Austurfréttar var hugmyndin rædd á fundi fulltrúa Icelandair, ferðaþjónustuaðila á Austurlandi og fulltrúa sveitarfélaga á Egilsstöðum sem haldinn var að frumkvæði Austurbrúar fyrir helgi.
Guðjón Arngrímsson, upplýsingafulltrúi Icelandair, staðfesti í svari við fyrirspurn Austurfréttar að á fundinum hefði verið „varpað fram ýmsum hugmyndum og þær ræddar." Hann ítrekaði þó að af hálfu Icelandair hefðu „engar ákvarðanir verið teknar."
Hugmyndin er sú að Flugfélag Íslands ferji farþega á milli Keflavíkur og Egilsstaða. Viðskiptavinir Icelandair geta þá keypt beint flug erlendis frá til Egilsstaða og öfugt. Innritun gæti orðið á Egilsstöðum og menn ekki þurft að hafa neinar áhyggjur af farangri sínum í Keflavík.
Í boði yrðu vikulegar ferðir yfir sumartímann. Verkefnið yrði tilraunaverkefni og fjárhagsleg áhætta af því hjá Icelandair.
Sambærilegt fyrirkomulag hefur verið í boði til og frá Akureyri. Uppbygging þess hefur gengið hægt en fulltrúar Icelandair munu hafa lýst meiri bjartsýni um Egilsstaðaflugið þar sem ólíklegra sé að menn keyri á milli Keflavíkur og Egilsstaða.
Beint flug er ekki í boði í bili en sá möguleiki kann að vera skoðaður frekar árið 2018 þegar von er á nýjum flugvélum í flota Icelandair. Þá sé flugfélagið til í að skoða lengra ferðatímabil komist á gott samstarf um nýtingu flugsins við ferðaskrifstofur.
Sem fyrr segir liggur enginn ákvörðun fyrir enn en von er á henni síðar í vor.
