Björn Valur: Reglur um fléttulista höfðu áhrif
Björn Valur Gíslason, þingmaður Vinstrihreyfingarinnar – græns framboðs, segir að reglur um fléttulista hafi verið meðal þess sem höfðu áhrif á ákvörðun hans að flytja sig úr Norðausturkjördæmi til Reykjavíkur fyrir komandi þingkosningar.
„Reglur um fléttulista á landsbyggðinni höfði áhrif á þessa ákvörðun mína ásamt ýmsu fleiru,“ er haft eftir Birni Val í nýjasta tölublaði Austurgluggans. Hann er að öðru leyti sagður litlar upplýsingar hafa viljað veita um ástæður vistaskiptanna.
Á bloggsíðu sinni segir Björn þó að hvatning frá stuðningsfólki VG í Reykjavík hafi haft mest áhrif á kvörðunina sem og „góður stuðningur og ráðgjöf minna góðu félaga í NA-kjördæmi.“
Björn Valur tók sæti á Alþingi 2009 eftir að hafa verið í þriðja sæti á listanum. Þuríður Bachman, sem var í öðru sæti, ætlar ekki að bjóða sig fram aftur.
Eyfirðingarnir Bjarkey Gunnarsdóttir og Sóley Stefánsdóttir hafa lýst yfir áhuga sínum á öðru sætinu. Í morgun staðfesti Ingibjörg Þórðardóttir, kennari við Verkmenntaskóla Austurlands, að hún byði sig fram í það sæti.
