Framleiðslustarfsmenn Fjarðaáls felldu nýjan kjarasamning
Nýr vinnustaðasamningur á milli Alcoa Fjarðaáls, Afls starfsgreinafélags og Rafiðnaðarsambands var felldur í atkvæðagreiðslu fyrir helgi. Verslunarmenn hjá Afli og starfsmenn í fiskimjölsbræðslum samþykktu hins vegar nýverið nýja samninga.Rúm 57% þeirra sem greiddu atkvæði um samninginn við Fjarðaál sögðu nei en tæp 40% já. Tæplega 80% þeirra sem höfðu atkvæðisrétt tóku þátt í atkvæðagreiðslunni.
Verslunarmenn í AFL-i hafa hins vegar samþykkt nýjan kjarasamning en þeir felldu samning sem gerður var fyrir jól. Tæp 85% sögðu já en samningurinn gildir til eins árs. Aðeins 20% tóku þátt í kjörinu.
Þá samþykktu 82% þeirra sem greiddu atkvæði nýjan kjarasamning í fiskimjölsverksmiðjum á félagssvæði AFLS og stéttarfélagsins Drífanda.
