Austfirðingar fylgjast með bandarísku forsetakosningunum
Austurfrétt býður til kosningavöku í tilefni bandarísku forsetakosninganna í Sláturhúsinu á Egilsstöðum annað kvöld. Í Neskaupstað ætla áhugasamir að hittast í Verkmenntaskóla Austurlands.
„Við höfum fundið fyrir áhuga í samfélaginu fyrir kosningunum. Niðurstaða þeirra hefur jú áhrif á alla heimsbyggðina. Fólk ræðir þetta út á götu en okkur fannst vanta samastað fyrir þessa áhugamenn og ákváðum að taka það að okkur að leiða þá saman,“ segir Dagur Skírnir Óðinsson, markaðsstjóri Austurfréttar.
Húsið opnar klukkan 22:00. Allir eru velkomnir og boðið verður upp á léttar veitingar. Sérfræðingar fara yfir stöðu mála og fylgst verður með kosningavökum á stærstu fréttastöðvum sem og helstu samfélagsmiðlum.
Nemendur í stjórnmálafræði í Verkmenntaskóla Austurlands ætla að halda kosningavöku í skólanum sem hefst klukkan 23:00 í stofu 1.
„Hugmyndin með þessari kosningavöku er að vekja áhuga þinn, borgari góður, á stjórnmálum. Að okkar mati er mikilvægt að fylgjast með svona stórum viðburði, vegna þess að sá sem vinnur þessar kosningar verður valdamesti maður heims,“ segir í frétta á vef skólans. Allir eru velkomnir en gestir eru hvattir til að mæta í einhverju bandarísku, til dæmis með kúrekahatt.
Nánari upplýsingar um kosningavöku Austurfréttar eru á Facebook.
