Tveir sóttu um embætti sóknarprests á Egilsstöðum
Tveir umsækjendur eru um embætti sóknarprests í Egilsstaðaprestakalli og fjórir um embætti prests. Prestarnir koma í stað séra Jóhönnu Sigmarsdóttur, núverandi sóknarprests og séra Láru G. Oddsdóttur, sóknarprests á Valþjófsstað sem láta af störfum í haust.Séra Sigríður Munda Jónsdóttir, sóknarprestur í Ólafsfjarðarprestakalli og séra Þorgeir Arason, héraðsprestur í Austurlandsprestakalli sóttu um stöðu sóknarprests sem veitist frá 1. ágúst.
Guðfræðingarnir Davíð Þór Jónsson, Elín Salóme Guðmundsdóttir, María Gunnarsdóttir og Ólöf Margrét Snorradóttir sóttu um prestsembættið sem veitt er frá 1. nóvember.
Umsóknarfrestur var til 15. apríl sl. Biskup Íslands skipar í embættið að fenginni umsögn valnefndar. Valnefnd skipa níu manns úr prestakallinu auk prófasts í Austurlandsprófastsdæmi.
Egilsstaðaprestakall var stofnað árið 2011 þegar Vallanes- og Eiðaprestakall runnu saman í eitt og skipaður var einn sóknarprestur í stað tveggja.
Seyðisfjarðarprestakall bættist við í fyrra en prestsetur er á Seyðisfirði. Í haust rennur svo Valþjófsstaðarprestakall einnig inn í Egilsstaðaprestakall.
