Nokkuð um útköll hjá austfirskum björgunarsveitum: Talsverðir vatnavextir
Austfirskar björgunarsveitir voru kallaðar út í ýmis verkefni í veðurofsanum í morgun þótt rólegra væri hjá þeim en sveitum annars staðar á landinu. Rafmagnslína gaf sig í Breiðdal seinni partinn eftir vatnavexti.Mestar voru annirnar hjá Ísólfi á Seyðisfirði samkvæmt yfirliti frá Landsbjörg. Þar sprakk gróðurhús, þak var að lyftast á skrifstofuhúsi, byrgja þurfti glugga í áhaldahúsi bæjarins og koma þurfti í veg fyrir að kofi á hesthúsasvæðinu fyki.
Á Vopnafirði þurfti að halda aftur af einum skjólvegg auk annarra smáverkefna og á Norðfirði var Gerpir kallaður út til að byrgja brotinn glugga.
Veðrið einkenndist af hvassviðri og rigningu en einnig hlýindum sem leiddu til töluverðra leysinga. Þá bættist við sólbráð í dag. Á Fagradal voru vegagerðarmenn að störfum eftir hádegið við að moka frá veginum til að vatn rynni ekki inn á hann. Eyvindaráin var kolmórauð og klakastífla í henni rétt neðan við Þuríðarstaði.
Víða hækkaði skarpt í ám og á hádegi var flóð í Geithellnaá í Álftafirði þar sem rennsli var ríflega 295 m3/s. Áin 35 faldaðist í rennsli frá kvöldmat í gær til hádegis í dag en hefur síðan rénað.
Svipaða sögu er að segja af Fossá í Berufirði en þar tuttugu faldaðist rennslið. Í Lagarfljóti við Egilsstaði hefur vatnshæðin hækkað um 20 sm í dag.
Þá flæddi Breiðdalsá yfir bakka sína við bæinn Kleif og hreif með sér rafmagnsstaur með þeim afleiðingum að rafmagnslaust varð í Breiðdal eftir kaffi. Rafmagn komst á fyrir kvöldmat eftir bráðabirgðaviðgerð en beðið er með lokaviðgerð þar til sjatnar í ánni.