Hálslón komið á yfirfall
Yfirborð Hálslóns náði í 625 metra hæð yfir sjávarmál á föstudag og er lónið þar með komið á yfirfall. Lónið hefur aldrei farið svo seint á yfirfall síðan það var fyrst fyllt síðsumars 2008.Sumarið eystra var óvenju kalt og því svo rann svo lítið vatn í lónið að óttast var að skerða þyrfti orku til stærsta kaupandans, Fjarðaáls. Af því verður ekki að sinni eftir óvenjuhlýjan septembermánuð.
Aldrei áður hefur það dregist fram í október að fylla lónið en árið 2011 var kominn 13. september áður en það fylltist. Árið 2010 var hins vegar lónið komið á yfirfall þann 28. Júlí.
Þegar vatn rennur á yfirfalli myndast fossinn Hverfandi við vestari enda Kárahnjúkastíflu niður að gljúfurbarminum og þaðan steypist vatnið 90-100 metra niður í Hafrahvammagljúfur. Fossinn er aflmikill og getur orðið vatnsmeiri en Dettifoss.
