Fjarðabyggð og VA semja um verknámskynningar
Fjarðabyggð og Verkmenntaskóli Austurlands undirrituðu um helgina samning um verknámskynningar í vinnuskóla sveitarfélagsins. Samningurinn byggir á tilraunaverkefni, en undanfarin tvö ár hefur verknámsvika verið fastur hluti vinnuskólanum fyrir nemendur í 9. bekk. Kynningin hefur farið fram fyrstu viku vinnuskólans og hefur þetta fyrirkomulag að sögn mælst vel fyrir hjá bæði starfsfólki skólans og unga fólkinu, sem gefst með þessu móti kostur á að kynna sér námsframboð skólans.
Með nýjum samstarfssamningi Fjarðabyggðar og Verkmenntaskóla Austurlands er þessi fjölbreytta verknámskynning nú orðin viðtekinn hluti af Vinnuskóla Fjarðarbyggðar.
Það voru þeir Páll Björgvin Guðmundsson, bæjarstjóri Fjarðabyggðar, og Elvar Jónsson, skólameistari VA, sem undirrituðu samninginn á Tæknidegi fjölskyldunnar, sem fram fór sl. laugardag í Verkmenntaskóla Austurlands.
Í tilkynningu á heimasíðu sveitarfélagsins kemur fram að auk þess sem verknámsvikan auki fjölbreytileika vinnuskólans, feli þetta samstarf sveitarfélagsins og VA í sér stuðning við námsframboð í heimabyggð. Þá sé verkefnið á pari við önnur sambærileg verkefni sem hafa að markmiði að auka veg verknáms hér á landi.
Mynd: Páll Björgvin Guðmundsson, bæjarstjóri og Elvar Jónsson, skólameistari VA, takast í hendur að undirritun lokinni. www.fjardabyggd.is
