Flugferðum austur á ekki að fækka með nýjum vélum
Forstjóri Flugfélags Íslands býst við að félagið haldi að mestu óbreyttri áætlun á flugferðum milli Reykjavíkur og Egilsstaða þótt fyrirtækið taki á næstunni í notkun nýjar og stærri vélar.
„Þetta mun hafa þau áhrif að með því að hafa möguleikann á stærri vélum erum við betur undir það búnir að sinna álagstímum, til dæmis í kringum helgar.
Þar sem við höldum tveimur minni 37 sæta vélum í flotanum getum við nýtt þær þegar minni eftirspurn er og þannig getum við haldið uppi mjög svipaðri tíðni á flugum og nú er til Egilsstaða,“ segir Árni Gunnarsson, forstjóri Flugfélagsins.
Í tilkynningu frá Flugfélaginu segir að alltaf verði að lágmarki þrjár ferðir daglega milli Reykjavíkur og Egilsstaða og á ákveðnum tímabilum verði meira sætaframboð en nú er.
Þrjár Bombardier Q400 vélar sem taka 74 farþega leysa á næstunni af fimm Fokker 50 sem taka 50 farþega. Fyrsta Bombardier vélin er væntanleg til landsins í byrjun febrúar.
