Landsbankinn dregur saman seglin á Seyðisfirði
Afgreiðsla Landsbankans á Seyðisfirði verður flutt um áramótin og afgreiðslutíminn styttur. Útlit er fyrir að starfsmönnum fækki við breytingarnar.Viðræður standa nú yfir við sýslumanninn á Austurlandi um að afgreiðsla bankans opni á sýsluskrifstofunni að Bjólfsgötu 7. Þeim er ekki lokið en útlit fyrir að samningar takist.
Afgreiðslan er í dag opin frá 12:30-16:00 virka daga nema á fimmtudögum er opnaði klukkan níu. Á nýja staðnum verður opið frá klukkan 12:00-15:00..
Einn starfsmaður mun vinna í afgreiðslunni í stað þriggja í dag. Samkvæmt upplýsingum frá bankanum er útlit fyrir að starfsfólki verði sagt upp við breytingarnar en endanlegar ákvarðanir þar um hafa ekki verið teknar. Starfsmönnum var tilkynnt um skipulagsbreytingarnar í dag.
Póstþjónusta er nú veitt í afgreiðslu Landsbankans á Seyðisfirði en það fyrirkomulag mun breytast. Pósturinn er í viðræðum við aðra mögulega samstarfsaðila og mun tilkynna breytingar á þjónustu sinni síðar.
Hraðbankinn í afgreiðslu Landsbankans á Seyðisfirði verður fluttur á nýjan stað og verður sem fyrr aðgengilegur allan sólarhringinn.
Í tilkynningu bankans segir að eftir breytingarnar verði afgreiðsla Landsbankans á Seyðisfirði með svipuðu sniði og í Bolungarvík, en þar tekur Landsbankinn þátt í rekstri þjónustumiðstöðvar í Ráðhúsi Bolungarvíkur ásamt sýslumanninum á Vestfjörðum og Póstinum.
Þar er bent á að miklar breytingar hafi orðið á rekstrarumhverfi banka á undanförnum árum. Rafræn bankaviðskipti hafi aukist og um leið minnki þörfin fyrir hefðbundin útibú. Þá séu gerðar ríkar kröfur um aukna hagkvæmni í rekstri bankans.
