Janne fékk heillaóskir frá Hillary Clinton
Janne Sigurðsson, forstjóri Alcoa Fjarðaáls, fékk nýverið heillaóskir frá Hillary Clinton, þá utanríkisráðherra Bandaríkjanna, auk Stevie-gullverðlaunanna sem forstjóri ársins í hópi kvenna í atvinnurekstri. Sérstaklega er minnst á virka þátttöku í austfirsku samfélagi í bréfi Clinton.Það var sendiherrann Luis E. Arrega sem afhenti verðlaunin og heillaóskaskeytið við hátíðlega athöfn í sendiráðinu. Stevie-verðlaunin eru alþjóðleg verðlaun sem veitt eru árlega þeim sem skara fram úr í stjórnun stofnana og fyrirtækja um allan heim. Janne var útnefnd forstjóri ársins 2012 í hópi kvenna í atvinnurekstri í Evrópu, Mið-Austurlöndum og Afríku, fyrir þátttöku í uppbyggingu, eflingu og rekstri álvers Alcoa við Reyðarfjörð.
„Ég fagna einstakri viðleitni þinni við að byggja upp álver Fjarðaáls og gera það að einu fullkomnasta álveri heims (state-of-the-art), þar sem uppfylltar eru ýtrustu kröfur um öryggi starfsmanna og umhverfis. Ég er þér einnig þakklát fyrir framúrskarandi virka þátttöku í samfélaginu á Austurlandi með öflugum stuðningi við menningarstarf og viðleitni til að stuðla að umbótum í menntun og umhverfi.
Viðskiptasamband Íslands og Bandaríkjanna er mikilvægur grundvöllur tvíhliða samskipta landanna. Bandaríkin meta mjög mikils störf þín á Íslandi, sem endurspegla háleitustu hugsjónir í bandarískum atvinnurekstri: sjálfboðaliðastörf, samfélagslega ábyrgð og samfélagsþróun. Vinsamlegast athugaðu að við fylgjumst spennt með störfum þínum í framtíðinni, og sendi ég þér mínar bestu óskir um áframhaldandi velgengni,“ segir í skeytinu frá Hillary.
Í tilkynningu segir að Janne hljóti verðlaunin fyrir þátttöku í uppbyggingu, eflingu og rekstri álversins á þeim sex árum sem hún hafi starfað þar. „Á þessum tíma hefur hún stjórnað mikilvægum umbótaverkefnum, lagt sig fram um að skapa öruggt vinnuumhverfi í álverinu og náð miklum árangri í að auka starfsánægju í fyrirtækinu. Hún hefur einnig tekið virkan þátt í að byggja upp samfélagið á Austurlandi, en hún býr á Eskifirði.“
Til móttökunnar í bandaríska sendiráðinu var m.a. boðið fulltrúum úr íslensku atvinnulífi. Á myndinni eru f.v. Janne Sigurðsson, forstjóri Alcoa Fjarðaáls, Gylfi Sigfússon, varaformaður Amerísk-íslenska viðskiptaráðsins (AMÍS) og Luis E. Arreaga sendiherra. Mynd: Alcoa Fjarðaál
