6o ár liðin frá silfurstökki Vilhjálms Einarssonar
„Vegna smæðar byggðarlagsins kom ekki til greina að stunda neinar hópíþróttir. Það voru ekki nógu margir í neitt lið. Auk þess voru hinir fáu jafnaldrar mínir ekki sérlega hneigðir fyrir íþróttir flestir hverjir og ég einn um þær kúnstir í þorpinu lengi vel,“ segir Vilhjálmur Einarsson á Egilsstöðum, oft nefndur „silfurmaðurinn“
Þann 27. nóvember næstkomandi verða 60 ár liðin frá því Vilhjálmur Einarsson stökk 16,25 metra í þrístökki á Ólympíuleikunum í Melborne í Ástralíu og af þessu tilefni hefur verið reistur minnisvarði um þetta glæsilega afrek Vilhjálms á flötinni fyrir framan Vilhjálmsvöll á laugardaginn. Minnisvarðinn sýnir í fullri stærð lengd stökksins 16.25 metrar og ber hann heitið „Silfurstökkið“.
Stökk Vilhjálms var nýtt Ólympíumet, sem stóð í tvo klukkutíma, en þá bætti Brasilíumaðurinn Ferreira Da Silva það með stökki sínu upp á 16,35 metra í fjórðu tilraun.
Hann endaði þar með í öðru sæti og varð fyrsti Íslendingurinn til að komast á verðlaunapall á Ólympíuleikum og er hann eini íslenski einstaklingurinn sem hefur náð öðru sæti í frjálsum íþróttum á Ólympíuleikum.
Minnisvarðinn reistur að frumkvæði Hattar og Fljótsdalshéraðs
Minnisvarðinn er reistur að frumkvæði Íþróttafélagsins Hattar og Fljótsdalshéraðs. Verkið er útfært af Vilhjálmi í samvinnu við MSV og VHE. Eftirtalin fyrirtæki, stofnanir og félagasamtök styrktu verkefnið:
Fljótsdalshérað, Íþróttafélagið Höttur, MSV stál & vélar, VHE vélaverkstæði, Rotarý á Egilsstöðum, Hitaveita Egilsstaða og Fella, Efla verkfræðistofa, Menntaskólinn á Egilsstöðum, Betra bak, Brúnás innréttingar, Vaskur, Keiluhöllin, Hamborgarafabrikkan, MVA, Islingua, Jónsmenn, PES vefum og hönnum, Alcoa, Ungmenna og íþróttasamband Austurlands, Ungmennafélag Íslands, Íþrótta- og ólympíusamband Íslands.
Afhjúpun minnisvarðans fer fram með athöfn laugardaginn 5. nóvember klukkan 15.00 við Hettuna á Egilsstöðum.