Bæjarstjórn hvetur íbúa Fjarðabyggðar til að styðja undirskriftarsöfnun við flugvöllinn í Vatnsmýrinni
Um 45.000 manns hafa undirritað stuðningsyfirlýsingu við „óskerta flugstarfsemi í Vatnsmýri til framtíðar.“ Vika er síðan söfnin hófst. Bæjaryfirvöld í Fjarðabyggð hvetja íbúa sveitarfélagsins til að skrifa undir.Í tilkynningu frá skipuleggjendum í dag segir að „engin undirskrifasöfnun hafi náð jafn miklu flugi á svo skömmum tíma.“ Söfnunin heldur áfram, bæði með undirskriftarlistum og á lending.is næstu fjórar vikur.
Í tilkynningunni segir enn fremur að áratuga óvissa um framtíð vallarins hafi valdið starfsemi á flugvellinum „miklum vanda og staði í vegi fyrir eðlilegum fjárfestingum og uppbyggingu atvinnustarfsemi.“ Þeirri óvissu megi eyða með því að festa staðsetninguna í sessi.
Á fundi bæjarstjórnar Fjarðabyggðar í vikunni var framtaki félagsskaparins Hjartað í Vatnsmýrinni, sem stendur að baki undirskriftinni, fagnað. Í bókunni segir að vera flugvallarins á núverandi stað sé „alger forsenda fyrir íbúa þessa lands hvort sem litið er til sjúkraflugs, stjórnsýslu eða annarrar þjónustu sem í boði er í höfuðborg landsins alls.“
Vísað er til nýlegrar skýrslu KPMG um neikvæð áhrif af flutningi miðstöðvar innanlandsflugsins úr Reykjavík á landsbyggðina. Bæjarstjórnin hvetur því bæði íbúa sveitarfélagsins og landsmenn alla til að kynna sér málin og leggja undirskriftasöfnuninni lið.
Fyrir skemmstu velti Jón Jónsson, lögmaður, upp þeirri spurningu í grein hér á Austurfrétt hvort einhliða ákvörðun Reykjavíkurborgar um breytingu á flugvellinum gæti skapað bótarétt gagnvart ríkinu.
Í kjölfarið sendi Austurfrétt innanríkisráðuneyti fyrirspurn um málið. Þeirri fyrirspurn hefur ekki verið svarað þrátt fyrir ítrekun.
