Atburðarásin skýrari eftir því sem talað er við fleiri
Rannsókn lögreglu á hnífsstunguárás í Neskaupstað í síðustu viku miðar vel. Rólegt var hjá lögreglu í kringum rokkhátíðina Eistnaflug sem haldin var í bænum um helgina.„Það er farin að komast mynd á atburðarásina. Hún verður betri eftir því sem maður heyrir í fleirum. Það er mikil vinna við svona mál, margs að leita og við marga að tala,“ segir Elvar Óskarsson, fulltrúi hjá lögreglunni á Austurlandi.
´
Karlmaður á fertugsaldri var síðasta fimmtudag úrskurðaður í fjögurra vikna gæsluvarðhald. Úrskurðinum var áfrýjað til Landsréttar og er niðurstöðu hans að vænta innan fárra daga.
Í stöðuuppfærslu sem fórnarlamb árásarinnar, þrítugur karlmaður, setti á Facebook um helgina segist hann hafa verið stunginn í bak og háls auk þess sem hann hafi fengið sár á hendi þegar hann reyndi að verja sig. Skýrsla var tekin af honum fyrir helgi.
Helgin var annars róleg hjá lögreglunni á Austurlandi. Þrjú minniháttar fíkniefnamál komu upp í kringum rokkhátíðina Eistnaflug en hátíðin gekk áfallalaust fyrir sig, þrátt fyrir talsverða ölvun gesta.
Umferð gekk vel í kringum hátíðina og þáðu margir ökumenn boð lögreglu um að blása í áfengismæla áður en þeir lögðu af stað heim. Talsvert er um hraðakstur í umdæminu sem lögreglan hefur reynt að stemma stigu við með að halda úti öflugu umferðareftirliti.
