Auknar líkur á „stórum náttúrulegum snjóflóðum“ á sunnudag
Viðvörunarstig vegna snjóflóðahættu á Austfjörðum hækkar á sunnudaginn kemur upp á fjórða stig sem þýðir mikla hættu samkvæmt nýjustu spá Veðurstofu Íslands.
Snjóflóðahætta hefur verið viðvarandi um nokkurt skeið í fjörðum Austurlands og allnokkur flekaflóð fallið bæði í Seyðisfirði og Eskifirði síðustu sólarhringana. Þar af eitt í stærra lagi ofan við Eskifjörð sem Austurfrétt greindi frá á miðvikudaginn var. Þau flóð féllu öll meðan hættustig var á þriðja stigi sem er töluverð hætta.
Samkvæmt hættutöflu snjóflóða er á fjórða stigi „talið líklegt að flóð falli víða í bröttum brekkum og það jafnvel við lítið álag á snjóþekjuna. Við sérstakar aðstæður geta fallið fjölmörg miðlungsstór og oft á tíðum stór náttúruleg flóð.“
Í útskýringum vegna aukinnar hættu segir að lagskiptir flekar hafi myndast yfir páskana í NA-éljagangi en þeir geti verið óstöðugir. Meðan veður helst gott stafar hætta fyrst og fremst af mannavöldum en aftur á að fara að snjóa og skafa um helgina og þar með aukast líkurnar á stærri náttúrulegum flóðum.
Þó engin snjóflóð austanlands síðustu daga hafi beinlínis verið af mannavöldum svo vitað sé, hafa minnst átta flóð fallið af þeim völdum á Norðurlandi síðan fyrir páskana. Í þeim nokkrum grófust einstaklingar og einn slasaðist töluvert. Öllum tókst þó að bjarga en mildi þykir að ekki hafi farið verr. Beinir Veðurstofan því til ferðafólks á fjöllum að gæta ýtrustu varúðar og forðast eftir megni brattar brekkur.
