Austfirðingum fjölgað um tæplega 1000 frá upphafi stóriðjuframkvæmda

Austfirðingar eru tæplega eitt þúsund fleiri í dag en þeir voru fyrir áratug áður en framkvæmdir hófust við Kárahnjúkavirkjun og álver Alcoa. Íbúum á svæðinu fjölgar lítillega á milli ára.

Samkvæmt tölum Hagstofunnar voru Austfirðingar 9.280 talsins þann 1. janúar árið 2003 en þeir voru 10.268 nýliðinn nýársdag. Samningar um álverið voru undirritaðir þann 15. mars árið 2003. Þetta þýðir fjölgun um 988 íbúa frá upphafi framkvæmda. Körlum eru um 60% af þessari fjölgun.

Fjölgunin er nánast eingöngu bundin við það svæði sem nú tilheyrir stóru sveitarfélögunum tveimur, Fjarðabyggð og Fljótsdalshéraði. Íbúum þar hefur samanlagt fjölgað um 1.274, heldur meira á Fljótsdalshéraði.

Í öllum hinum sveitarfélögunum á svæðinu hefur þeim fækkað, alls um 286. Mest er fækkunin í Breiðdalshreppi, 87 á stóriðjutímanum. Þar er sömuleiðis langmest hlutfallsleg fækkun, þriðjungur. Á Seyðisfirði og Vopnafirði hefur íbúum fækkað um 70 eða tæp 10%.

Íbúum á svæðinu fjölgar um 55 frá 1. janúar 2012 til 1. janúar 2013. Hlutfallslega er fjölgunin mest á Vopnafirði og í Fljótsdal, 2,5%. Breiðdælingum fækkar áfram mest, um tíu eða 5,3%.

 

 Búið er að leiðrétta íbúatölu miðað við sameiningar sveitarfélaga í töflunni.