Bættar samgöngur lykilforsenda nýs sveitarfélags
Umfangsmiklar samgönguframkvæmdir eru forsenda þess að sú framtíðarsýn sem lagt er upp með í sameiningarviðræðum fjögurra sveitarfélaga á Austurlandi nái fram að ganga. Lagt er til að Landhelgisgæslan komi upp starfsstöð á Egilsstöðum.Þetta er meðal þess sem fram kemur í minnisblaði samstarfsnefndar um sameiningu Fljótsdalshéraðs, Djúpavogshrepps, Borgarfjarðarhrepps og Seyðisfjarðarkaupstaðar sem afhent var þingmönnum nýverið.
Í framtíðarsýn nefndarinnar er fjögur samgönguverkefni sett í forgang. Í fyrsta lagi göng milli Seyðisfjarðar og Fljótsdalshéraðs, sem auk þess að tryggja betri umferð myndi opna fyrir þann möguleika að leggja hitaveitu frá Egilsstöðum til Seyðisfjarðar.
Í öðru lagi að byggður verði upp heilsársvegur yfir Öxi, í þriðja lagi að Borgarfjarðarvegur verði lagður bundnu slitlagi og í fjórða lagi að flugvöllurinn á Egilsstöðum verði efldur, bæði sem gátt inn í landið og að innanlandsflug fáist á raunhæfu verði.
Í kafla um heilbrigðismál er enn fremur lagt til að á vellinum verði bækistöð sjúkraþyrlu auk þess sem þar verði starfsstöð Landhelgisgæslunnar á Austurlandi. Þá er því heitið að sjúkrabílar verði staðsettir í öllum byggðakjörnum.
Talað er um að þjónusta sýslumannsins á Austurlandi verði eflt með að viðhalda henni á Seyðisfirði og fjölga stöðugildum í afgreiðslu á Egilsstöðum.
Auk framlaga til samgangna á landi er lögð áhersla á að hafnarframkvæmdir á Seyðisfirði, á Djúpavogi til að mæta uppbyggingu í fiskeldi og Borgarfirði.
Vilja er lýst til að efla þjónustu við eldri borgara þannig að fólk geti búið alla ævi í heimabyggð og nýtt sveitarfélag verði leiðandi í að innleiða velferðarþjónustu fyrir eldri íbúa sem og börn og fjölskyldur.
Nýtt sveitarfélag yrði landfræðilega stærsta sveitarfélag landsins með fjóra byggðakjarna og umfangsmikið dreifbýli. Í vikunni hefur verið fundað með íbúum í kjörnunum fjórum og verður síðasti fundurinn á Egilsstöðum í kvöld. Hann hefst klukkan 18:00 og verður kynning á verkefninu í byrjun hans send beint út á netinu.
