Björgunarsveit kölluð út til að sækja sleðamann á Vopnafjarðarheiði
Björgunarsveitin Vopni frá Vopnafirði var kölluð út rétt fyrir klukkan eitt í dag vegna vélsleðamanns sem slasaðist um 500 m frá kofanum í Aðalbóli á Vopnafjarðarheiði.
Björgunarsveitin fór á staðinn á tveimur bílum og var læknir með í för. Ferðin gekk vel og voru bjargir komnar á slysstað um 45 mínútum eftir að útkall barst. Þá voru ferðafélagar mannsins búnir að búa um hann en svefnpoka og teppi var að finna í kofanum.
Verið er að flytja hinn slasaða með björgunarsveitabíl niður að Ytri-Hlíð í Vesturárdal þar sem sjúkrabíll bíður. Maðurinn er ekki talinn vera alvarlega slasaður.
